𝗗𝗜𝗟𝗜 – Suku Kuluhun, Postu Administrativu Kristu Rei hahu halo levatamamentu dadus ba komunidade sira neebe mak sei afeita kontrusaun estrada husi Ponte Kuluhun too ba Fatuahi.
“Foin daudaun iha tuku 9:00, hau simu ona ekipa ida husi Obras Publiku katak, ami hodi ona notifikasaun balun iha nee para ita no ita nia xefe aldeia atu fahe informasaun ruma ka partilha ba ita nia komunidade sira neebe mak ami tau ona sinal para tempu barak ami tun karik sira la bele atu hakfodak ka bele mos sira dehan liu rai ho xefe aldeia la fo antes informasaun ba ami,” hatete Xefe Kuluhun, Deus Dado Martins ba jornalista sira iha Sede Suku Kuluhun, Kuarta (02/10/2024).
Nia dehan, nuudar autoridade lokal fo ona informasaun ba komunidade sira neebe mak ekipa husi Ministeriu Obras Publiku nee mai tau sinal iha semana kotuk.
Planu husi Governu nia katak, sei loke luan dalan hahu husi Ponte Kuluhun ba too iha fatuahi, neebe Suku Kuluhun uma kain 21 ka liu mak sei afeita ba kontrusaun ida nee.
“Husi Suku Kuluhun ita nia baliza mak iha Ponte Maufelo pur volta 21 ka bele liu husi xefe famíliar mak sei afeita ba konstrusaun ida nee, tanba ami sei halo levatamamentu dadus mak foin hatete detalhu, hau tauk hau fo liu tiha fali mos ida mak la kona fali mos ladun diak,” nia deklara.
Nia informa, ekipa husi MOP lori ona karta mai para ohin hahu daudaun ona halo servisu atu fahe informasaun ba sidadaun sira neebe hela besik estrada ibun atu prepara aan ona.
Nia koalia bazeia ba karta neebe mak haruka, maibe bainhira los mak atu ezekuta nee ladun hatene.
Iha fatin hanesan, Komunidade Kuluhun Armindo Maia hatete, autoridade lokal sira fahe ona informasaun katak, komunidade sira neebe hetan ona marka ka sinal husi MOP tenke perepara aan, tanba loron besik ona.
Entretantu ekipa husi Ministériu Obras Públiku (MOP) tau ona sinal kada Uma kain idak-idak nebee hela besik iha estrada ibun, hein loron halao ona eviksaun, tanba nee komunidade sira perepradu ona, wainhira tun hetan akompanha husi Xefe Suku, Xefe Aldeia nomos OPS.
(jen)
Fontes Notisias: STLNEWS
